Cuma künü, martnıñ 13-nde, infarkt neticesinde qırımtatar milliy areketiniñ veteranı Mustafa Osmanov vefat etti.
Bu aqta qırımtatar faalleri Zair Smedlâ ve Nariman Celâl bildireler.
Qırımlı Mustafa Osmanov Euromaydannıñ faal iştirakçisi edi. 2013-2014 seneleri narazılıqlar vaqtında pilâv pişirip, faallerge dağıttı. Osmanov er kün 300-400 insannı aşata edi.
2014 senesi mayısnıñ 3-nde oğlu Edem Osmanovnen beraber qırımtatarlarnıñ lideri Mustafa Cemilevni Qırımnıñ memuriy sıñırında qarşılağanlardan biri edi.
Bundan soñ işğal etilgen Qırımnıñ Rusiye akimiyeti Mustafa Osmanovnıñ oğlu Edemni tutıp, onı 2014 senesi mayısnıñ 3-nde «Berkut» hadimine ücüm etkeninde qabaatladı ve Rusiye Ceza kodeksiniñ 318-inci maddesiniñ 1-inci qısmına istinaden (vazifesini yapqan akimiyet vekiline qarşı ayatı ya da sağlığı içün telükeli olmağan zorbalıqnı qullanuv) mahküm etti.
2014 baarinde işğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette tintüvler ötkere.
