Qırımtatar faali Riza Asanov «Tavrida» yolunı videoğa çıqarğanda kimligi belli olmağan insanlar tarafından ücümge oğrağanını Rusiye politsiyasına bildirdi. Bu aqta yanvarniñ 2-nde «Qırım birdemligi» cemaat birleşmesi haber ete.
Asanovnıñ bildirgenine köre, «hadimlerden iç birisi ariza berilgenini tasdıqlağan bir de bir vesiqa bermedi».
«Eki ariza alğanlar, amma maña tek küçük kâğıtçıq berildi. Men kopiyalarnıñ berilmesini ya da foto çıqarmağa izin berilmesini rica ettim. Amma bir şey alamadım. Bu şaraitlerde bir özüm çıqmaycam. Eki yıldan berli apayımnen yoldamız ve o, er yerde yanımda ola. Bugün ilk sefer bir özüm çıqtım, bu adise oldı», – dep qayd etti Asanov.
Qırımnıñ Rusiye politsiyası qırımtatar faaliniñ arizasını daa izaatlamadı.
Yanvarniñ 2-nde saba qırımtatar faali Riza Asanov Qarasuvbazarda ücümge oğrağanını bildirdi.
Qırım.Aqiqatqa malümat bergen Riza Asanov ücümni «faaliyetinen» bağlağanını qayd etti.
2018 senesi dekabr ayında qırımlı advokatlar Emil Kurbedinov ve Edem Semedlâyevniñ ofisine ücüm etilgen edi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
