Qırımtatar faali, Yaltadaki «Hizb ut-Tahrir davası» mabüsiniñ qızı Gülsum Aliyeva Ermeni Bazardaki politsiya bölüginden yiberildi. Rusiye quvetçileri onı Qırımnıñ memuriy sıñırında Facebookta yazğanları içün «nefret ya da duşmanlıq doğurğanında» (Rusiye Memuriy cinayetler kodeksiniñ 20.3.1) qabaatlap tuttı.
«Politsiya bölügine ketirmek ve qıdırmaq içün sebep yoq edi. FSB operativ hadimi Aleksandr Kompaniytsevniñ küçük yamanlığı, o, Gülsumğa qarşı cinaiy dava qapatılğanını bilip, onı qıdıruvğa qoya», – dep tarif etti Qırım.Aqiqat mühbirine advokat Aleksey Ladin.
Şimdi Aliyeva advokatınen beraber evge kete.
Keçken sene iyül ayında Rusiye telükesizlik organlarınıñ hadimleri Yaltadaki «Hizb ut-Tahrir davasınıñ» iştirakçisi Muslim Aliyevniñ evinde «tahqiqat tedbirler» keçirgeni aqqında haber etilgen edi. Daa soñra belli olğanına köre, onıñ üyken qızı Gülsum Aliyevağa protokol tizilgen. O, Rusiye CK (milletlerara zıddiyet çıqaruv) 282-nci maddesine köre qabaatlana.
2019 senesi yanvar ayında Aluştadaki Tahqiqat bölügi Gülsum Aliyevağa qarşı cinaiy davanı qapattı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
Qırım akimiyeti ise yarımadada vatandaşlarnıñ söz serbestligi bozulğanını inkâr ete.
