Qırımtatar faali Edem Dudakovnıñ evinde keçirilgen tintüvden soñ onı Aqmescitteki FSB idaresine alıp kettiler, dep haber ete "Qırım birdemligi".
Qayd etilgenine köre, tintüv saba saat yedide başlandı. Rusiye quvetçileri qoradan atlap, qapularnı açqanlar.
''İçki camlı qapunı parladılar, içki demirli qapu açılmadı ve olar qaqıp başladılar. Tintüv keçirilgende, hadimlerniñ bir qısmı onıñnen, bir qısmı ise onıñ apayı Elvina Dudakovanen yüre edi. Em azbarnı, em garajnı baqıp çıqtılar'', - dep bildirdiler faaller.
Tintüv saba saat doquzda yekünlengen. Dudakovnıñ evinde protokol tizilgen, amma qorantağa kopiyasını qaldırmağanlar.
"Apayı oña ilâc ve termosta çay berdi. Onıñ şeker hastalığı ve yüksek qan basımı bar. Dudakovnıñ aqrabaları oña nisbeten nasıl status olğanını bilmeyler, amma uquqiy yardım içün muracaat ettiler'', - dep yaza ''Qırım birdemligi''.
Qorçalayıcılarnı uzun vaqıt devamında tintüv vaqtında ve soñra polis bölüginde Dudakovğa yibermediler, dep aytıla haberde.
Edem Dudakov qırımtatar faali, Qırımtatar halqı Qurultayınıñ delegatı, Qırımnıñ milletler işleri Cumhuriyet komitetiniñ sabıq yolbaşçısı. Qırımnıñ Rusiye tarafından ilhaqından soñ Dudakov "Hansarayınıñ qoruyıcısı" olaraq belli oldı. Faallerniñ aytqanına köre, Rusiye "restavratsiyası" neticesinde binalarnıñ kerçek elementleri ğayıp ola, binalar ise zarar köreler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
