Qırımda patlayıcı madde ve silânı qanunsız saqlağanında qabaatlanğan qırımtatar faali Edem Bekirovnı, Semaşko adına hastahaneden çıqarılmasına azırlaylar. Bu aqta Qırım.Aqiqat mühbirine “Agora” halqara uquq qoruyıcı gruppasını advokatı Aleksey Ladin bildirde.
Advokatnıñ aytqanına köre, müşterisi hastahaneden çıqarılacağı aqqında haberni o endokrinolog ekiminden bildi.
“Endokrinolog ve onı baqqan başqa ekimler - otolaringolog, kardiolog, cerrah, pulmonolog, terapevt - hastanıñ alı aqqında vesiqa azırlay. Endokrinolog aytqanına köre, Bekirovnı hastadanede tutmaq başqa ihtiyac yoq: insulini yazıldı, qanında şeker kerekli seviyege ketirildi. Kardiolog ve başqa ekimlerden yazılğan ilâclar barmı, yoqmı - bilmeyim. Bilgenime köre, otolaringolog, kardiolog ve pulmonolog onı endi baqtı”, - ikâye etti Ladin.
Advokat, Edem Bekirovnı SİZOğa qaytarırlar dep tahmin ete. Bundan ğayrı, advokat, onı Bekirovğa hastahanege yibermegenlerini bildirdi, amma bir kün evel Aqmescit SİZOsınıñ baş muavini Dmitriy Minko, ziyaret içün “mahsus beyanatlar kerekmey, order ve advokat şeadetnamesi yeterli” dep iddia etken edi.
Ladin, bu adisege imaye uquğınıñ bozuvı dep ayttı ve Qırımdaki Rusiye Cezalarnı Eda etken hızmeti hadimleriniñ areketlerine mahkemege şikâyet berecegini bildirdi.
Şimdilik Semaşko adına hastahanede bu malümatnı tasdıqlamaylar.
Yanvarniñ 15-nde Bekirov Aqmescitteki Semaşko hastahanesine tibbiy teşkerüv yapılması içün alıp ketirildi.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq.
Ukraina Tış işler nazirligi mahkemeniñ qararına qarşı «sert narazılıq» bildirdi.
