Aqmescit №1 SİZOsınıñ tibbiy bölüginde tutulğan qırımtatar faali Edem Bekirovnıñ sağlıq vaziyeti fenalaştı. Bu aqta advokat Aleksey Ladin Qırım.Aqiqat mühbirine bildirdi.
«Soñki dört kün küçlü tutuluvları ola, pek ağıra, yuqlap olamay. Bundan ğayrı, yürek problemleri bar. Soñki ay küçlü aritmiya bar. Bir şey yapsa, meselâ, turıp sipirki alsa, aritmiya arta, qan basımı oynap başlay. Şu sebepten yatmağa mecbur», – dedi advokat.
Ladinniñ aytqanına köre, qan şekeri yükselmesin dep, müvekkili pek az aşay.
«İnsulin arttırılsa da, qan şekeri yüksek, onı bu pek qasevetlendire. Aç qalıp, qan şekeri seviyesini idare etmege tırışa, amma bir şey aşamağanda şekeri tez tüze», – dedi o.
Bundan ğayrı, Edem Bekirovnıñ tuvğanları oña tibbiy bölükke bitken ilâclarnı berip olamay, dep bildire.
«Qızınıñ aytqanına köre, o, eki kün devamında babasına ilâc berip olamay. Tünevin şeker ve yürek ilâcları bitti. Tibbiy bölük ekimi bunı inkâr ete: er kün bütün ilâclar qabul etile. Bugün qızı ilâclarnı daa bir kere bermege tırışacaq. Edem Bekirovnıñ aytqanına köre, hastalıqları kerginleşken soñ o, tibbiy hadimni çağırmağa tırışa, amma daa bir kere bile kimse kelmedi. Tibbiy bölük hadimlerine kiriş yoq», – dedi advokat.
Malüm ki, Ukraina Yuqarı Radasınıñ insan aqları vekâletlisi Lüdmila DenisovaRusiye ombudsmeni Tatyana Moskalkova ile Rusiyede apiste tutulğan Edem Bekirov, Volodımır Baluh ve Volodımır Dudkağa mustaqil tibbiy teşkerüv temin etilüvi aqqında añlaştı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
