Qırımda tevfiq etilgen qırımtatar faali Edem Bekirovğa Aqmescit SİZOsına bütün kerekli ilâcları yollanıldı. Bu aqta dekabr 21-de advokat Aleksey Ladin Qırım.Aqiqatqa haber etti.
“Şimdilik o temin etilgen, bilgenime köre, eñ azından ilâcları bar. Qabaatlav ilân etilgende (dekabr 19 - QA), qorantası bütün ilâclarnı, sarğılavnı yapmaq icün kerekli şeylerni yollağanı belli oldı. Niayet o raatsızlağan ayağını başqadan sarıp oldı. Amma buña baqmadan, onı umumiy kamerada tutalar, onıñ hastalıqlarınen bu asıl mümkün degil. Oña asıl SİZOda oturmaq mümkün degil’, - dedi Ladin.
Dekabr 18-ine Edem Bekirovnıñ qızı Eleonora, onıñ babası ilâclarını alıp olamağanını bildirdi.
Ukraina Yuqarı Radasınıñ insan aqları vekâletlisi Lüdmila Denisova, tutılğan qırımtatar faaline acele tibbiy yardım kösterilmesi içün muracaatta bulunğanını bildirgen edi.
Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq. Ukraina Tış işler nazirligi mahkemeniñ qararına qarşı «sert narazılıq» bildirdi.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
Herson vilâyetindeki Novoalekseyevka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutuldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
