Link açıqlığı

Saatnıñ esas haberi

Qırımtatar faali Bekirovğa Aqmescit SİZOsında berilgen insulin allergiya yapa – advokat


Edem Bekirov
Edem Bekirov

Rusiye uquq qoruyıcıları tarafından silâ ve patlayıcı maddelerni qanunsız saqlağanından şübheli sayılıp tutulğan qırımtatar faali Edem Bekirovğa tibbiy teşkerüvden soñ berilgen insulin iñektsiyaları allergiya yaptı. Bu aqta advokat İslâm Velilâyev müvekkilini Aqmescit SİZOsında ziyaret etip, Qırım.Aqiqat mühbirine bildirdi.

«Tünevinki (martnıñ 13-ü – QA) insulin iñektsiyasından soñ alt dudağı şişti. Daa evel de olğan edi – insulin allergiya yapa. SİZO tibbiy bölüginiñ ekimi çağırıldı, o, allergiyağa qarşı ine yaptı», – dedi advokat. Müvekkili tibbiy yardım alıp özüne keldi.

Advokatnıñ aytqanına köre, Bekirovnıñ şekeri yüksek qala.

«Onıñ alını stabil yaramay dep aytar edim. Şeker seviyesi pek yüksek, künde üç kere insulin berile, faydası yoq. Nefes tarlığı başlandı, nefes almaqta zorlana. Kene oturıp yuqlamağa başladı», – dedi Velilâyev.

İmaye Bekirov SİZOda nezaret altında buluna bile kibi netice çıqarğan tibbiy teşkerüv qararını şikâyet etmege ve Bekirovnıñ Semaşko hastahanesinde yañı tibbiy teşkerüvden keçmesini ve tedaviylenüvini talap etmege niyetelene.

«Onı iç olmağanda tibbiy bölükke alsa ediler, daa bir qarar olur edi, er daim ekimlerniñ nezareti altında olacaq edi», – dep tarif etti Velilâyev.

Advokatnıñ bildirgenine köre, Bekirov tutulğanından üç ay keçse de, bir de bir tahqiqat tedbiri keçirilmedi.

Ukraina ombudsmeni Lüdmila Denisova Ukrainadaki AB Missiyasınıñ yolbaşçı muavini Annika Valdemann ile körüşip, silâ ve patlayıcı maddelerni qanunsız saqlağanında qabaatlanğan qırımtatar faali Edem Bekirovnıñ sağlıq vaziyetini muzakere etken edi. o, Bekirov ekimlerniñ yardımına ve kerekli tutuluv şaraitlerine muhtac, dep qayd etti.

Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.

Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.

XS
SM
MD
LG