Rusiye kontrolindeki Sudaq şeer mahkemesiniñ silânı qanunsız alıp saqlağanında qabaatlanğan qırımtatar faali İlver Ametovnıñ dava oturışuvında ekspert-ballist Alâdinov (oturışuvda adı aytılmadı – QA) kene sorğuğa çekildi, dep haber ete Qırım.Aqiqat mühbiri.
Onıñ aytqanına köre, Ametovdan tintüvden soñ tutıp alınğan silâdan ancaq yetmegen parçalarnı qoşqan soñ ateş açmaq mümkün.
Ekspertniñ aytqanına köre, tedqiq etilgen eşyada mandal qutusı ve tetik yoq edi. Ekspert namluğa kelişken mandalnı özü qoydı. Tetikke basılsa, ateş açılmadı, dep añlattı. Ateş açılması içün burğuçnen basmağa mecbur oldı.
İmaye, ekspertten tedqiq etilgen eşyanıñ işine kirişüvniñ qanunğa uyğun olıp olmağanını añlatmasını rica etti. Ekspert, müim olmağan defektlerni tüzetmege imkân bergen usullarğa esaslandı. Bir sıra parçanıñ olmamasını kiçik defekt sayıp, devlet qabaatlayıcısınıñ sualine eşyalar silâ parçaları ola, dep tasdıqladı.
2019 senesi sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ aza şeadetnamesi, müzey eşyaları, bazı vesiqalar «ekspertizağa» alındı.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Advokat Nazim Şeyhmambetovnıñ Qırım.Aqiqat mühbirine bildirgenine köre, Rusiye quvetçileri tintüvlerni Rusiye Ceza kodeksiniñ 280, 282 ve 238 maddelerine istinaden cinayetlerden şübhe bar olğanı içün «tahqiqattan evel teşkerüvi çerçivesinde» keçirdi.
Bu sene mayıs ayında berilgen malümatqa köre, Kreml kontrolindeki Sudaqnıñ Mirovoy mahkemesi İlver Ametovğa 150 biñ ruble para cezasını bermege qarar aldı. Para cezası onıñ iş adamı olaraq köstergen faaliyetinen bağlıdır.
2014 senesiniñ Rusiyeniñ Qırım işğalinden soñ mustaqil jurnalist, vatandaş faali, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
