"Birincisi yazıp alınğan ses yazılarında Umerovnıñ sesiniñ olıp olmağanını belgilemek içün fonografik ekspertiza. Bu ekspertizanı FSB ekspertler müessisesiniñ ekspertlerine keçirmege buyurılğan. İç işler nazirli, Federal telükesizlik hızmetiniñ erkânında olğan müessiselerniñ ekspertlerine işançımız yoq. Bu eksertizanıñ başqa ekspert müessisesinde keçirilmesini istedik. Bizim muracaatımızğa cevap şimdilik daa yoq", - dep bildirdi Semedlâyev.
Advokatnıñ sözlerine köre, ekincisi tintüv vaqtında tutıp alınğan kitaplarda Umerovnıñ DNK-sı olıp olmağanını belgilemek kerek. Bu ekspertizanı da RF İİN ekspert müessisesinde keçirmege buyurılğan. Semedlâyev bu ekspertizanıñ da başqa müessisede keçirilmesini istegen.
«Qırım platforması» sammiti keçirilgen soñ ertesi künü, avgustnıñ 24-nde, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Erkekler tutuldı.
O künü Rusiye kontrolindeki Aqmescitniñ Kiyev rayon mahkemesi Ruslan Asanov, Amethan Umerov ve Remzi Nimetulayevni eki ayğa SİZOda qaldırdı. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
