Bazarertesi künü advokat izolâtorda müvekkilini yoqlağan. Advokatnıñ bildirgeni kibi, bu, 28 kün devam etken statsionar psihiatrik ekspertizadan soñ tahqiqat tevqifhanesinde Umerovğa ilk kelmesidir.
Onıñ sözlerine köre, onı bir kişilik kameradan dört kişilik kamerağa avuştırğanlar. Psihiatrik eksertizasından evel eki ay devamında o bir kişilik kamerada tutulğan. Siyasiy mabüs baquv şaraiti "azmı-çoqmı qanaatlendirici, rejim ise pek sert" olğanı aqqında aytıp bergen.
Diger mabüsler de yañı tahqiqat tevqifhanesiniñ sert baquv rejiminden şikâyet etken ediler. Olarnıñ sözlerine köre, anda mahkümler aman-aman bütün kün ayaqta keçire ekenler. Saba saat 6-dan aqşam saat 10-ğa qadar oturmağa ya da yatmağa esaqtır. Kamera bütün kün video nezareti astındadır. Sportnen yalıñız sport meydanında ve SİZO müdiriyetiniñ izni ile oğraşmaq mümkün eke.
«Qırım platforması» sammiti keçirilgen soñ ertesi künü, avgustnıñ 24-nde, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Erkekler tutuldı.
O künü Rusiye kontrolindeki Aqmescitniñ Kiyev rayon mahkemesi Ruslan Asanov, Amethan Umerov ve Remzi Nimetulayevni eki ayğa SİZOda qaldırdı. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
