Rusiye quvetçileri tarafından Aqmescitteki 2-nci SİZO-da tutulğan Qırımtatar faali Amethan Umerov soy-sopundan mektüpler almay eken. Bunı "Qırım birdemligi" cemaat birleşmesi advokatı Edem Semedlâyev ve apayı Feride Halilovağa atıf etip bildire.
Berilgen malümatqa köre, yaqalanğan qırımtatarnıñ ailesi yalıñız Rusiye prokuraturasına şikâyet bergen ve 2-nci SİZO-nıñ reberi ile körüşken soñ kiçik bir aş-suv yollamanıñ berilüvi aqqında añlaşqan.
"Men oña bildirdim ki, SİZO-ğa yollamalar meselesi umumen iç bir şekilde al etilmegen. Şunıñ içün yalıñız tahqiqat tevqifhanesiniñ müdirine muracaat etilgen soñ apayı kiçik bir yollama berip oldı", - dep ayta Semedlâyev.
Al-azırda Umerov Aqmescitte hastahanede mecburiy psihiatrik ekspertizada buluna. Oktâbrniñ 12-nde apayı hastahanege yollama ketirgen, amma hadimler onı qabul etmegenler ve bütün yollamalar tahqiqat tevqifhanesinden keçmeli dep bildirgenler.
"Birincide, men Qırım prokuraturasına şikâyet berdim. Çünki 2-nci SİZO-da bizim aqlarımız bozula. Ekincide, men müdir Anton Gorkun ile körüştim. Ve olar eki alma, sigaret, tualet kâğıtı, qurabiye, ötmek ve suv almağa qabul ettiler. Qalın urbalar, şampun kibi şeylerni almadılar", - dep bildirdi apayı.
Amethan Umerovğa mektüpler ne içün berilmey sualine müdir "printer bozuq" dep cevaplanğan.
«Qırım platforması» sammiti keçirilgen soñ ertesi künü, avgustnıñ 24-nde, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Erkekler tutuldı.
O künü Rusiye kontrolindeki Aqmescitniñ Kiyev rayon mahkemesi Ruslan Asanov, Amethan Umerov ve Remzi Nimetulayevni eki ayğa SİZOda qaldırdı. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
