Rusiyeniñ nezareti astında olğan Cenübiy bölgeniñ arbiy mahkemesi cemaat jurnalisti Remzi Bekirovnıñ SİZo-da tutulğan müddetini apis müddetine qoşqan. "Qırım birdemligi" cemaat birleşmesiniñ haber etkeni kibi, Rusiyeniñ Krasnoyarsk bölgesindeki 2-nci sanlı Yeniseyka apishanesinde Bekirov daa bir yıl keçirecek.
Edem Semedlâye bildirdi ki, mahkemede SİZO-da bir künniñ apishanede olğan künnen bir olğanını añlatqanlar.
"Ümüt etem ki, apishaneniñ müdiriyeti içün müddetni ğayrıdan baqıp çıqmaq ve kerek olğnından ziyade tutmamaq içün bu añlatma yeterli olur", - dep ayttı imayeci.
Şimdi Remzi Bekirov pek sert şaraitte tutula. Oña kün devamında yataqta oturmaq ya da yatmaq yasaq, tek turmaq ya da demir skemlede oturmaq mümkün. Tükândan bir ayda tek 6 biñ rublelik bir şey ala bile. Evge telefon etmek ya da banderol almaq bir yılda bir kere mümkün eken.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
