Yarı ağır çekide 23 yaşında qırımlı boksçı Artur Ziyatdinovnıñ vekilleri nevbetteki uruşta raqibi 33 yaşında tecribeli argentinalı Sezar Herman Reynoso olacaq, dep ilân etti. Bu aqta MMABoxing portanı haber ete.
Uruş yanvarniñ 25-nde Montrealde (Kanada) olacaq. Ziyatdinovnıñ Instagram saifesinde yaşçğanına köre, fizik alı pek yahşı ve 12-nci uruşına azır.
«İnşaAllah, yanvarniñ 25-nde 12-nci uruş olacaq. Daa yaqında ihtisasiy boksta debütim olacağını sabırsızlıqnen beklep azırlanğanımnı hatırlayım», – dep yazdı boksçı.
Artur Ziyatdinov bundan evel ring veteranı Darnell Bunnı esapqa köre yeñdi.
Sezar Herman Reynoso soñki uruşını 2019 senesi noyabr ayında Argentinada keçirip, diger argentinalı Fabio Gabriel Barossonı yeñdi.
Qırımtatar asıllı ihtisaslı boksçı Artur Ziyatdinov Özbekistanda doğdı ve 2008 senesi qorantasınen beraber Aqmescitke keldi. İdmancı Sergey Lapinniñ reberligi altında azırlandı. Al-azırda Kanadada yaşay ve azırlıq köre. Aveskâr boksında 140 uruşı oldı, 120-nde ğalip çıqtı. 2017 senesi Artur ihtisasiy boksqa keçti.
