Yarı ağır çekide qırımlı boksçı 23 yaşında Artur Ziyatdinov 33 yaşında argentinalı Sezar Herman Reynosonı yeñdi. Bu aqta MMABoxing portalı haber ete.
Uruş yanvarniñ 25-nde Monrealde (Kanada) oldı.
Menbanıñ bildirgenine köre, uruşnıñ başında ve soñunda qırımlı ögde edi.
«Artur uruş ketişatını kontrol etip, 5-inci raundda raqibini ekinen yeñdi, soñra ise muhalifni sağdan urdı ve o, ringniñ köşesinde tiz çökip oturmağa mecbur edi. Referi keldi ve uruşnı toqtattı», – dep aytıla haberde.
Ziyatdinov, Instagram saifesinde uruşnıñ netice fotosını paylaştı.
Argentinalınen keçirilgen uruş Artur içün yarı ağır divizionda ekinci oldı. Artur Ziyatdinov bundan evel ring veteranı 40 yaşında Darnell Bunnı esapqa köre yeñgen edi.
Qırımtatar asıllı ihtisaslı boksçı Artur Ziyatdinov Özbekistanda doğdı ve 2008 senesi qorantasınen beraber Aqmescitke keldi. İdmancı Sergey Lapinniñ reberligi altında azırlandı. Al-azırda Kanadada yaşay ve azırlıq köre. Aveskâr boksında 140 uruşı oldı, 120-nde ğalip çıqtı. 2017 senesi Artur ihtisasiy boksqa keçti.
