Ukraina jurnalistleri milliy birliginiñ İğor Lubçenko söz serbestligini qoruv milliy mukâfatınıñ taqım laureatı işğal etilgen Qırımda taqip etilgen qırımtatar cemaat jurnalistleri oldı.
UJMB yolbaşçısı Serğiy Tomilenkonıñ bildirgenine köre, bu qarar UJMB Kâtibiyeti tarafından qabul etildi, toplaşuv noyabrniñ 5-6-nda Kyivde keçirile.
«Yasaq, basqı, taqip, apis cezalarına baqmadan, qırımtatar cemaat jurnalistleri Ukraina ve dünya kütleviy haber vastaları içün yarımadada olıp keçken adise-vaqialar aqqında tarafsız malümat menbası olıp qala. Yarımada ilhaqınıñ soñki beş yılı devamında aq qorçalayıcılar jurnalistlerge yapılğan 300-den çoq basqını qayd etti, olarnıñ arasında ücüm ve işkence de bar», – dep qayd etti UJMB reisi.
Onıñ aytqanına köre, bu mukâfat qırımlı zenaatdaşlar Nariman Memedeminov, Server Mustafayev, Remzi Bekirov ve diger cemaat jurnalistlerinen birdemlik ola.
Mukâfat yıllar devamında UJMB reisi olğan İğor Lubçenkonıñ adını taşıy ve Ukrainada söz serbestliginiñ qorunmasına qoşqan isse içün berile. Onı doquzıncı kere bereler. 2016 senesi mukâfat laureatı Azatlıq Radiosı ve Qırım.Aqiqatnıñ müellifi Mıkola Semena olğan edi.
Rusiye quvetçileri Mıkola Semenağa işğal altındaki Qırımnı terk etmege yasaq etkeni içün mukâfatnı Azatlıq Radiosı ukrain hızmetiniñ Qırım.Aqiqat leyhasınıñ reberi Volodımır Prıtula teslim aldı.
