2023 senesi Çerkasıda defin etilgen qırımtatar askeri Nariman Seytmemetovnı Ukrayina devlet başı Volodımır Zelenskıy ölümden soñ "Cesaret" nişanı ile taqdirledi. Bunı Ukrayina Prezidentiniñ Qırım MC daimiy temsilciliginde haber ettiler.
Ukrayinanıñ devlet suvereniteti ve topraq bütünliginiñ mudafaasında köstergen şahsiy cesareti ve arbiy borcunı fedakârlıqnen yerine ketirgeni içün ölümden soñ III derece"Cesaret" nişanınen taqdirlendi.
"Nariman Seytmemetov Qırımda doğdı ve büyüdi. Yarımada işğal etilgen soñ Çerkasığa taşındı. 2023 senesi mart ayında Ukrayina Silâlı Quvetleriniñ sırasına qoşuldı. O arbiy bölükderinden birinde qurşunatqıççı vazifesinde hızmet ete edi. Donetsk vilâyetinde arbiy vazifesini eda etken zaman elâk oldı", - dep yazıla bildirmede.
Sentâbrniñ 24-nde Qırımdan ukrayinalı arbiy İldar Egamberdiyevniñ cenazesi oldı. Arbiy iyünniñ 8-nde Zaporijjâ vilâyeti yönelişindeki uruşlarda elâk oldı. Egamberdiyev 47-nci ayrı mehanikleştirilgen brigadanıñ bölükleriniñ erkânında cenkleşe edi.
Qışta Ukrayinada Rusiyege qarşı cenkte qırımtatar Asan Seydametov elâk olğan edi.
Daa evel Ukrayinadaki cenkte qırımtatar Seyran Kadırov elâk olğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
