Rusiye tarafından "Qırım musulmanları davası" boyunca 16 yıl apis cezasına mahküm etilgen qırımtatar faali ve vatandaş jurnalisti Seyran Saliyevni dört aydan ziyade ceza izolâtorında tuttılar, dep bildire onıñ ömür arqadaşı Mümine Saliyeva Facebook saifesinde.
"Seyran ilk yaz ayınıñ 10-dan orta küz ayınıñ 25-ne qadar ceza izolâtorında tutuldı. İç bir malümat yoq, tış dünya ile bağ yoq. O, er bir sözümni diqqatnen diñlrp, er bir vaqia ile meraqlandı. Faal insan içün böyle izolâsıya ağır bir yük ola. Amma o bunı baş ete", — dep yazdı Saliyeva.
Mümine, yaqında aqayını apishanede ziyaret etkenini de bildirdi.
"Men, o tez azatlıqqa işanğanını isteyim. Allah içün imkânsız şey yoq. Ve bizim dinimizge köre, quşlar taqımı küçlü fillerni yeñdi", — dep yaza Saliyevnıñ apayı.
O şunı da qoştı ki, aqayı Rusiye quvetçileri tarafından "Hizb-ut-Tahrir" teşkilâtına alâqası bar olğanında qabaatlanğan dört qırımtatar qadınınıñ tutuluvı aqqında haberge şaşqan
2017 senesi orta küz ayında Rusiye quvetçileri Bağçasaraynıñ altı sakinini yaqaladı. Bu Timur İbragimov, Marlen Asanov, Memet Belâlov, Seyran Saliyev, Server Zekiriyev ve Ernes Ametov.
Rusiye FSB-si onı Rusiyede ve işğal etilgen Qırımda yasaq etilgen "Hizb ut-Tahrir" teşkilâtında iştirak etkeninde qabaatladı.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi 2020 senesi sentâbr ayında Bağçasaraydaki ekinci "Hizb ut-Tahrir davası" boyunca üküm çıqardı.
Apiske alınğanına qadar Saliyev ekskursiya rehberi olıp çalıştı. Tasil boyunca o, türk ve qırımtatar tilleriniñ filologıdır. Saliyev "Qırım birdemliginiñ" vatandaş jurnalisti olıp, Rusiyeniñ qırımtatarlarğa qarşı repressiyalarını aydınlattı.
