Ukrayin yırları içün qırımlılarnıñ taqip etilmesini insanlıqqa qarşı cinayet kibi saymaq mümkün. Bunı "QırımSOS" aq qoruyıcı teşkilâtınıñ talilcisi Yevgen Yaroşenko "Çervona kalına" yırı yanğırağan Bağçasaraydaki toynıñ teşkilâtçıları ve iştirakçilerine qarşı basqılarnı izaatlap bildirdi.
"İşğalniñ 8,5 yılı devamında Qırımda ukrayin timsalleri, atributları ve diger Ukrayina tarafdarı baqışları içün sistematik taqip tecribesi şekillendi. Bu köntekstte qırımlılarnıñ ukrayin yırları içün taqip etilmesi insanlıqqa qarşı cinayet kibi sayıla bile. Bunıñ içün bu işke alâqası olğanlar Halqara cinayet mahkemesinde mesüliyetke celp etile bile", - dedi Yaroşenko.
"QırımSOS" teşkilâtında qayd etkenleri kibi, Bağçasarayda toyda yañğırağan ukrayin yırı içün taqip em şahsiy ve aile ayatına ürmet aqqınıñ, em de fikir serbestligi aqqınıñ bozulmasıdır.
"Avropa insan aqları mahkemesi Rusiyeni fikir serbestligi aqqını, şahsiy ve aile ayatına ürmet aqqını bozğan bir devlet kibi mesüliyetke celp ete bile", - dep qoştı Yaroşenko.
Rusiye kontrolindeki Bağçasaray rayon mahkemesi «Çervona kalına» yırı yanğırağan toy saipleri ve musafirlerini memuriy mesüliyetke çekti. Rusiye mahkemesi mezkür yırnı «Ukrayina milletçileriniñ uruş türküsi» dep adlandırdı.
Berilgen malümatqa köre, umumen 6 insan memuriy mesüliyetke çekildi. Olarnıña adları ve soyadları aydınlatılmay. Mahkeme saytında Ahtem Gemeciniñ Rusiye ordusını «itibardan tüşürüv» ve «nefret ya da duşmanlıq doğuruv» maddelerine istinaden mesüliyetke çeküv aqqında haber etile. Telegram kanalları Gemecini toy çalğıcısı dep adlandırdı.
Qırımlı Rusiye tarafdarı bloger Aleksandr Talipov Telegram kanalında, onıñ malümatına köre, sentâbrniñ 10-nda Bağçasaraydaki «Arpat» restoranında keçirilgen toynıñ videosını paylaştı. Videoda musafirler «Çervona kalına» ukrayin yırı yanğırağanda oynay. Talipov Aqmescitteki diger toynıñ da videosını paylaştı, anda «Eurovisionda» ğalebe qazanğan Kalush Orchestra taqımınıñ Stefania türküsi yanğıray.
Qırımda ukrayın yırlarınıñ icra etilüvi sebebinden ilk taqip degil. Bu yıl avgust ayında Qırımdaki Rusiye mahkemesi Şçelkino şeerindeki «Krab» qavesinde YARMAK ukrayın reperiniñ «Dıke pole» yırını qoyğanı içün dicey Yuriy Radionovğa 40 biñ ruble para cezasını ve 10 kün apis cezasını berdi. Onıñ aytqanına köre, ukrayin yırını qave musafirlerinden biri sımarladı, onıñ mündericesini bilmey edi. Daa soñra Rusiye mahkemesi «Dıke polenı» sımarlağan Dmitriy Gaynğa 50 biñ ruble para cezasını berdi.
Bundan evel kütleviy haber vastaları ukrayın yırı qoyulğanı içün dicey ve qave musafiriniñ «qabaatını tanuv» videosını derc etti. İçtimaiy ağlarda olğan videoda «Krab» qavesinje «Dıke pole» klipi kösterile. O, «Ukrayina Silâlı quvetleri yaşasın», dep yazıla.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
