Rusiye arbiylerini Qırımnıñ ğarbındaki grajdan binalarına yerleştireler. Bunı "QırımSOS" uquq qoruyıcı teşkilâtınıñ yolbaşçısı Oleksiy Tılnenko haber etti.
"QırımSOS"qa malüma olğanı kibi, rusiyeliler öz arbiylerini yerleştirmek içün Qırımda şahsiy grajdan binalarını zapt etmege başladılar. Şimdilik böyle allar Aqmeçit rayonınıñ Yarılğaç köyünde qayd etildi", - dedi Tılnenko.
"QırımSOS"nıñ malümatına köre, Yarılğaçtaki binalardan biriniñ saibini rusiye arbiyleriniñ qalması içün yer ayırmağa mecbur etkenler. Uquq qoruyıcılar bu adamnıñ telükesizlik sebebi ile red etip olamağanını tahmin eteler.
"Rusiye arbiyleriniñ istihkam inşaatlar qurulğanı zaman şahsiy binalarnı zapt etmesi alları aqqında da belli. Bizge malüm olğanı kibi, qasabada rusiye arbiyleriniñ sayısı bayağı arttı", - dedi o.
Rusiye akimiyeti Rusiye ordusınıñ Qırımda yerleşken yeri aqqında malümat bermey.
Bir qaç kün evelsi, Qırımnıñ Aqmeçit rayonınıñ Yarılğaç köyünde bellisiz kişiler direk üstüne Ukrayina bayrağını asqanlar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
