Oktâbrniñ 25-nde rusiye Aqmescitte yañı tahqiqat tevqifhanesini açtı. Bunı "QırımSOS" uquq qoruyıcı teşkilâtınıñ yolbaşçısı Oleksiy Tılnenko haber etti.
"Yañı SİZO Aqmescit şeerinde 1-nci tüzetüv cezahanesiniñ territoriyasında açıldı. Sığımlığı 300 adamdan çoq, 1-nci SİZO-nıñ sığımlığından eki qat ziyadedir", - dedi o.
Malüm olğanı kibi, 747 kişi içün yeri olğan bu tahqiqat tevqifhanesi şimdi toludır. Kimerde tevqiflilerniñ sayısı № 1 SİZO-nıñ sığımlığından eki qat ziyade ola edi. Soñki sefer bina 1803 senesi, açılıuv vaqtında tamir etilgen. 2022 senesi oktâbrniñ 25-ne qadar bu işğal etilgen yarımadadaki yekâne tahqiqat tevqifhanesi edi.
"Daa bir SİZO-nıñ açılması şimdi Qırımğa Ukrayinanıñ yañı işğal etilgen topraqlarından büyük sayıda adamlarnıñ köçürilmesi delâlet ete. Em de Qırımnıñ özünde de tevqifler devam etmektedir ve bu sebepten işğalcilerniñ bu kibi yañı müessiselerge ihtiyacı bar", - dedi Tılnenko.
2014-2020 seneleri "QırımSOS" Qırımda 44 kişi mecburen tutıp esir etilgenini qayd etti, olarnıñ arasında 15-niñ taqdiri ve bulunğan yeri aqqında alâ daa bir şey belli degil.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
