Qırımdaki Rusiye akimiyeti aselet qırımtatarlarnıñ yarımadadaki temsilciliginiñ taqlidini yapa ve aynı zamanda olar kütleviy şekilde eñ büyük tehdit olaraq qavmiy gruppanıñ temsilcilerini taqip ete. Bunı Poloniya radiosına "QırımSOS" uquq qoruyıcı teşkilâtınıñ temsilcisi Sabina İlyasova bildirdi.
"Medeniy aqlarğa kelgende, rusiyeliler bizim [qırımtatarlarnıñ] medeniyetimizni inkişaf ettirmek içün imkânlarımız bar olğanı kibi köstereler, amma kerçekte öyle degil. Qırımda yekâne qırımtatar telekanalı olğan ATR-nı qapattılar. Onıñ temsilcileri taqip etile. Bir çoq muarririyet yarımadanı terk etmege mecbur oldı, çünki anda söz serbestiligi bozula. Bu da bizim içün medeniyet alâmetidir. Bu telekanal qırımtatar medeniyetiniñ irişmelerini köstere edi", - dep ayta o.
Onıñ sözlerine köre, Qırımda qalğan jurnalistler uydurılğan siyasiy davalarnıñ qurbanları olalar. 2014 senesinden başlap olardan eñ az 19-ı cinayet taqiplerniñ qurbanı oldı, 16-sı ise apistedir.
Uquq qoruyıcılar eñ büyük problema til meselesi olğanını bildireler. 2014 senesinden soñ qırımtatar tilini ögrenme saatları bayağı azlaşqan, atta sıfırğa yetken.
Evel Qırımtatar resurs merkeziniñ haber etkeni kibi, yarımadada işğal devamında siyasiy sebeplerden 301 kişi taqip etilgen, olardan 202 qırımtatardır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
