2021 senesinden berli Qırımda işğal mahkemeler ögünde eñ az 10 kütleviy tevqif dalğası yüz berdi, dep bildirdiler "QırımSOS" uquq qoruyıcı teşkilâtında.
2021 senesi sentâbrniñ 4-nde Aqmescitte RF FSB-sıñ binası ögünde bunıñ arfesinde yaqalanğan qırımtatar Nariman Celâl, Asan ve Aziz Ahtemovlarğa destek bildirmek içün toplaşqan 60 kişi yaqalanğan edi. Rusiye quvetçileri 58 dava açqan edi, 24 kişi "maska rejimini bozuv içün" 5 ile 30 biñ ruble arasında para cezasına mahküm etilgen edi.
2021 senesi oktâbrniñ 11-nde RF polisi Qurman "Hizb ut-Tahrir davası" boyunca mahkeme oturışınıñ neticelerini bilmek içün mahkeme binası ögünde toplaşqan 20 faalni yaqalanğan edi.
2021 senesi oktâbrniñ 25-nde Qurman "Hizb ut-Tahrir davası" boyunca mahkeme oturışınıñ yayınlaması ötkerilgen işğal mahkeme binası ögünde 21 kişi yaqalanğan edi. O künü yaqalanğanlar arasında soñra 12 künge tevqif etilgen advokat Edem Semedlâyev de bar edi. 14 kişi 10 ile 15 biñ arasında para cezasına mahküm etilgen edi.
2021 senesi oktâbrniñ 29-nda işğal polisi mahkeme binası ögünde toplaşqan 31 faalniñ ve cemaat jurnalistini yaqalanğan edi. O künü üçünci "Hizb ut-Tahrir davası"nıñ mabüslerine üküm çıqarılğan edi.
2021 senesi noyabrniñ 21-nde Qurman "Hizb ut-Tahrir davası" boyunca mahkeme oturışınıñ neticelerini bilmegen istegen 19 faal yaqalanğan edi. 12 kişi "karantin qaidelerini bozuv" içün 8 ile 15 biñ ruble arasında para cezasına mahküm etilgen edi.
2021 senesi noyabrniñ 23-nde memuriy tevqiften soñ azat etilgen Edem Semedlâyevni qarşılamağa kelgen 31 kişi yaqalanğan edi. Yaqalanğanlar arasında qadınlar ve balalar bar edi.
2022 senesi fevrniñ 18-nde Bağçasaray rayon mahkemesi binası ögünde bunıñ arfesinde yaqalanğan qırımtatar Edem Dudakovnı desteklemek içün kelgen 15 qırımtatar yaqalanğan edi.
2023 senesi yanvarniñ 25-nde Aqmescitte işğal Kiyev rayon mahkemesinde Canköy rayonında tintüvlerden soñ yaqalanğan altı qırımtatarnıñ davası boyunca diñlevler vaqtında 34 kişi yaqalanğa edi.
2023 senesi iyülniñ 27-nde Aqmescitte işğal Qırım Yuqarı mahkemesi ögünde 14 kişi yaqalanğan edi. Anda Nariman Celâl, Asan ve Aziz Ahtemovlarnıñ ükmüne qarşı berilgen istinaf mahkemesiniñ oturışı yayınlana edi. Yaqalanğanlar arasında olarnıñ soy-sopları, jurnalistler Kulamet İbraimov ve Lutfiye Zudiyeva. Kulamet İbraimov 5 künge tevqif etilgen edi, Lutfiye Zudiyeva ise 12 ile 15 biñ ruble arasında para cezasını alğan edi.
2023 senesi avgutsnıñ 25-nde Aqmescitte işğal mahkemesiniñ binası ögünde 22 kişi yaqalanğan edi. Olar keçende Bağçasarayda tintüvlerden soñ yaqalanğa altı qırımtatarnı desteklemek içün toplaşqan ediler. Yaqalanğanlarnıñ episine 1 ile 7 kün arasında memuriy tevqif tayin etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
