Qırımnıñ Yedi Quyu rayonında Rusiye akimiyeti Ukrayinağa qarşı cenk iştirakçilerine bermekni planlaştırğan biñ topraq damartısını azırladı. Bu aqta Rusiye kontrolindeki Qırım mülkiyet ve topraq munasebetleri naziriniñ muavini Anatoliy Zaiçenko bildirdi, dep yaza Rusiye kütleviy haber vastaları.
Beyanatqa binaen, altı soqaqtan ibaret olğan yerler Azaq deñiziniñ yalısında eki qasaba Kamenskiy (835 yer) ve Solânıy (231 yer) territoriyasında yerleşken.
"Bu, SVO iştirakçilerine berilmesi içün Qırımda şekillengen beşinci topraq massividir. Al-azırda 2,5 biñden ziyade yer ayırıldı", — dep bildire RİA Novosti.
Bu sene mayıs ayında Qırımnıñ Saq ve Qara deñiz rayonlarında Ukrayinağa qarşı cenk iştirakçilerine bermek içün tahminen 1,5 biñ topraq damartısı teşkil etilgenini bildirgen ediler.
Bundan evel Qırımnıñ Rusiye yolbaşçısı Sergey Aksönov bildirdi ki, Ukrayina ile cenk iştirakçileri Qırımda tahminen 730 topraq damartısını aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
