Qırımnıñ Rusiyege aitligi aqqında iç bir muzakereler olmaycaq, şunıñ içün Ukrayina yarımada işğali meselesi halqara toplulıqnıñ radarlarından ğayıp olmasın dep "Qırım platforması" çerçivesinde çalışmaqnı devam ete. Bu aqta Prezidentniñ QMC-deki daimiy temsilcisi Tamila Taşeva bildirdi.
"Ebet, Qırım Ukrayina devletiniñ qısmı ola, onıñ içün Rusiye ile onıñ aitligi aqqında iç bir muzakereler olmaycaq", – dep qayd etti o.
Memur, Ukrayina lideri Volodımır Zelenskıynıñ, işğalden azat etüv tek Ukrayina havfsızlığı ve topraq bütünligi meselesi olğanı içün degil, anda taqip şaraitlerde Ukrayina vatandaşları yaşağanı içün de kerek, dep aytqan sözlerini tekrarladı.
"Biz er vaqıt insanlarnıñ qaytması aqqında aytamız. Biz yalıñız topraqlar içün degil, insanlar içün de küreşemiz. Qırımtatarlar ve diger tamır halqlar içün barışıqta yaşamaq, inkişaf etmek ve yaşamaq içün yekâne imkân Qırım yarımadasınıñ işğalden azat etilmesi ve Ukrayina devletiniñ bayrağı altına qaytarıluvıdır", - dep qayd etti prezidentniñ temsilcisi.
Taşevanıñ aytqanına köre, avgustnıñ 23-nde keçirilecek "Qırım platforması" ükümet sammitine ve bu sene Litvaniyada keçirilecek parlament sammitine faal azırlıq yapıla.
Ukrayina tarafından teşebbüs etilgen "Qırım platforması" halqara koordinatsion mehanizmi 2021 senesi avgust ayında Kıyivde tesis sammitinde başlandı. Platformanıñ maqsadı halqara kün tertibinde Qırımğa diqqatnı saqlap qalmaq, Qırımda insan aqlarını qorçalamaq, yarımadanıñ işğalden azat etilmesine yardım etmek ve ilâhre.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
