Link açıqlığı

Saatnıñ esas haberi

Qırımnıñ Rusiye universitetinde faaller "devlet tili institutını" açmaq isteyler


Tasviriy resim
Tasviriy resim

Oktâbrniñ 15-nde Vernadskiy adına Rusiyeniñ Qırım federal universitetinde keçirilgen Qırımdaki birinci universitetniñ 106 yıllığına bağışlanğan tedbirlerinde KFU reberliginden KFU qurulışında "devlet tili institutı"nı meydanğa ketirmek teşebbüsi seslendi, dep haber ete Qırım.Aqiqat muhbiri.

Qırımnıñ işğalden azat etilmesi içün #LiberateCrimea halqara kampaniyasınıñ Qırım bölüginden alınğan malümatqa köre, bu teşebbüsni KFU Filologiya institutınıñ rus, slavân ve umumiy tilşınaslıq kafedrasınıñ müdiri Aleksandr Rudyakov teşviq ete.

"KFU rektoratından menbalarımız bildirgenine köre, özüni Qırımnıñ baş rusçısı olaraq tanığan, KFU-da rus tili kafedrasınıñ müdiri vazifesini eda etken Aleksandr Rudyakov, KFU Filologiya İnstitutınıñ rus ve çetel edebiyatı kafedrasınıñ müdiri vazifesini eda etken, şimdiki rektornıñ qardaşı Sergey Kuryanov ile beraberlikte "devlet tili institutı"nıñ teşkil etilmesini talap eteler. Olar bu ğayeni rektor vazifesini eda etkenniñ qulağına faal sürette qoyalar. Yañı institutta rus tili ocalarını azırlamaq planlaştırıla", — dep bildire faaller.

Olarnıñ aytqanına köre, bu siyasiy bir leyha, çünki al-azırda Qırımda bu saada yeterli qadar mütehassıslar azırlana. "Başqa mesele ise, işğal etilgen Qırımda oca zenaatınıñ itibarı az olğanı sebebinden, olarnıñ episi mektepke çalışmağa baralar", — dep qayd ettiler faaller.

Rusiye Federatsiyasınıñ nezaretinde olğan Qırım federal universitetiniñ Vernadskiy adına aliy oquv yurtu 13 institut, bir akademiya, altı kollec ve bir tehnikumnı birleştirgen işğal etilgen Qırımnıñ eñ büyük aliy oquv yurtudır.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG