Qırımnıñ Rusiye prokuraturası, Rusiye tarafdarı olğan bloger Aleksandr Talipovnıñ öldürilmesine teşebbüs etken eki şübelige qarşı davanı mahkemege berdi.
Rusiye tahqiqatınıñ versiyasına köre, qabaatlanğanlar, "Ukrayina territoriyasında bulunğan belgisiz şahıslarnıñ emirlerine köre areket etip", 1 million rusiye rublesine "Racer" mopedini satın aldılar. Olar mototsiklniñ sandığına patlav cihazını yerleştirdiler ve onı Kefedeki evniñ azbarına ketirdiler. 2023 senesi iyülniñ 12-nde yüz bergen patlav neticesinde eki adam yaralandı.
Bundan da ğayrı, qabaatlanğanlardan biri Kefe şeerinde "Z" timsali olğan evlerniñ birisinde park etilgen maşnanı ateşke berdi. Davanı Rusiye Federatsiyasınıñ Feodosiya şeer mahkemesine yolladılar.
Talipov Telegram kanalında Ukrayinağa qoltutqan qırımlılarnıñ şahsiy malümatlarını derc ete. Talipovnıñ şikâyetleri neticesinde qırımlılar Rusiye ordusınıñ "areketini" "ayıplağanı" içün memuriy ve cinaiy mesüliyetke çekile. Ukrayina prokuraturası Talipovğa qarşı "Milliy zıddiyet ve nefret doğurmaq" maddesine istinaden cinaiy dava açtı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
