Rusiye nezaretindeki Qırım Yuqarı mahkemesi "Beşinci Bağçasaray gruppasınıñ" mabüsleri Remzi Nimetulayev, Eldar Yakubov, Amethan Umerov, Ruslan Asanov ve Seydamet Mustafayevniñ apis müddetiniñ uzatılmasına qarşı muracaatını red etti, dep haber ete "Qırım birdemligi".
Advokat Edem Semedlâyevniñ aytqanına köre, mahkeme, mabüsler advokatları tarafından yazılğan şikâyetlerniñ kopiyasını almağanları içün oturışuvnı başqa künge avuştırmağa razı olmadı.
Rusiye mahkemesi Amethan Umerovnıñ qırımtatar tilinden terciman berilmesi aqqında muracaatını da red etti.
''Mahkemeniñ oturışı qapalı şekilde keçti. Ne sebepten olğanı belli degil... Müvekkillerimiz video bağı vastasınen çıqışta bulundı. Oturışqa diñleyicilerni yibermeyler. Menimce, bu basqı usullarından biridir... Müvekkillerimizni tahqiqat izolâtorınıñ sert şaraitlerinde tutqanlarınıñ yekâne sebebi - FSB-niñ olar gizlene ya da şaatlarğa tesir ete bileceginden qorqması degil, olarğa basqı yapılması, özüni terrorist olaraq tanıtmaqtan vazgeçkenleri içün intiqam..'', - dep ayttı advokat Emil Kurbedinov.
Avgustnıñ 24-nde Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Avgustnıñ 25-nde Rusiye kontrolindeki Aqmescitniñ Kiyev rayon mahkemesi tutulğanlarnı eki ayğa SİZOğa yolladı. Bu qarar alınğanda mahkeme binası ögünde oturışuvğa kelgen faaller kütleviy şekilde tutuldı. Umumen 23 kişi tutuldı, dep haber etildi, olarğa Rusiye ordusında askerlik celpnameleri berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
