Qırımnıñ Rusiye parlamentiniñ yolbaşçısı Vladimir Konstantinov, Rusiye kontrolindeki yarımada akimiyeti Ukrayinadan Qırımdaki ukrayin ücümlerinden sebep "zarar ödemesini" talap etecek ola, dep bildirdi, dep yaza Rusiye kütleviy haber vastaları.
Konstantinovnıñ bildirgenine köre, Qırımnıñ Rusiye akimiyeti bu "zararnı" qıymetlendirmege azır.
"Şübesiz: bu esapnıñ ödenmesi içün deliller tapılacaq", — dep bildirgen Rusiye kontrolindeki Qırım parlamentiniñ reisi.
Rusiye akimiyeti bu "kompensatsiyanı" nasıl etip elde etmege niyetlene, Konstantinov añlatmadı. Ukrayina akimiyeti bu beyanatlarnı daa izaatlamadı.
Daa evel Qırımnıñ Rusiye akimiyeti Ukrayinadan "suv qamaçavı sebebinden 150 milliard rubleden ziyade zararnı" talap etmege niyetlengenini bildirgen edi. Rusiye mahkemesi bu davanıñ baqılmasını iyülniñ 31-ne tayin etti, amma soñra onı sentâbrniñ 13-ne avuştırdılar. Şimaliy-Qırım kanalı aqqında strategik malümatlar sebebinden dava qapalı şekilde baqıldı.
Ukrayina Devlet ekologik inspektsiyasınıñ malümatına köre, Rusiye Ukrayinağa Şimaliy-Qırım kanalından Dnipro suvınıñ berilmesini başlap, 15 milliard grivnadan ziyade zarar ketirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
