Qırımnıñ Rusiye akimiyeti Rusiye tarafından işğal etilgen Ukrayinanıñ cenübindeki topraqlarından ukrayin zahiresini Afrika ve Yaqın Şarq memleketlerine satmaq niyetindedir. Bunı bazarertesi künü kendi telegram kanıdında RF prezidentiniñ Qırımdaki daimiy temsilcisi, Qırımnıñ vitse baş naziri Georgiy Muradov haber etti.
"Azat etilgen (Rusiye akimiyeti işğalge böyle deyl – QA) Herson ve Zaporijjâ vilâyetleriniñ topraqlarında çekilgen zahireniñ büyük miqdarına köre zahireniñ naqil etilmesi içün gemileri olğan gemi saiplerine üstünlik berile", - dedi o.
Tafsilâtlar aqqında haber bermedi.
Evel Qırım.Aqiqat Aqyarnıñ zahire terminalında yüklenüv içün gemiler turğanı aqqında defalarca bildirgen edi.
Ukrayina akimiyeti Rusiyeni işğal etilgen topraqlarda eñ azı 400 biñ tonna zahire qırsızlağanında qabaatlay.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
