Qırımnıñ Qarasuvbazar rayonındaki Ortalan köyünde Rusiye quvetçileri çeçek ayınıñ 1-nde dört qırımtatarlar evinde tintüv keçirgen. Bunı çarşenbe künü Qırımtatar Milliy Meclisiniñ reisi Refat Çubarov Facebook saifesinde bildirdi.
Onıñ aytqanına köre, tintüvler vaqtında Rusiye FSB-siniñ hadimleri silâ ve başqa yasaq etilgen şeylerni, şu cümleden Rusiye akimiyeti tarafından yasaq etilgen cedvelge kirsetilgen kitaplarnı qıdırğanlar. Şu cümleden, Çubarovnıñ yazğanına köre, tintüv ATR telekanalında çalışqan qırımtatar jurnalisti Gülsum Halilovanıñ ana-babasınıñ evinde keçirilgen.
"Vaqia yerinden alınğan malümatqa köre, Halilovlarnıñ qorantasına kirgen cezacılar 75 yaşında Halilov bir qaç künden berli hasta olğanı ve şu sebepten yataqta yataqanı aqqında malümatqa emiyet bermediler. Maskalı silâlı FSB hadimleri evniñ bütün odalarını tintti ve bütün elektron vastalarnı, şu cümleden telefonlarnı tutıp aldı. Bunıñen beraber, ceza hadimleri evge kirgen soñ, qomşular Halilovlarğa kirip olamasınlar ve Rusiye varbarları yapqan qanunsızlıqnıñ şaatları olmasınlar dep, azbarğa bütün kirişlerni qapatqanlar", — dep yazdı Çubarov.
O şunı da qoştı ki, tintüv vaqtında Halilov yaramağan, neticede onı acele yardım alıp ketken.
Evlerinde tintüv keçirilgen diger qırımtatarlarnıñ adlarını Çubarov bildirmedi.
Rusiye quvetçileri tintüvler aqqında resmiy şekilde haber etmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
