Qırımnıñ Qarasuvbazar rayonınıñ rusiyeli akimiyeti ealiden ''Rusiye quvetçilerine'' naqliyat infrastrukturası obyektlerinde ''diversiya azırlanuvı'' mümkün alâmetleri aqqında vaqtında haber etmege talap ete. Mütenasip muracaat Rusiye Federatsiyası kontrolindeki Qarasuvbazar rayon memuriyetiniñ telegram kanalında derc etildi.
Hususan, Rusiye akimiyeti, Rusiye quvetçilerine naqliyat infrastrukturası obyektleriniñ foto ve video qaydlarını yapqan "şübeli şahıslar" aqqında bildirmege talap ete.
"Qırım Cumhuriyetiniñ Qarasuvbazar rayonı memuriyeti, naqliyat obyektlerinde diversion ve terroristik areketlerni yapmaq içün azırlıq alâmetleri, naqliyat infrastrukturası obyektleriniñ etrafında şübeli şahıslar peyda olğanda, diqqatlı olmağa ve uquq qoruyıcı organlarnı vaqtında haberdar etmege rica ete", - denile beyanatta.
Daa evel Ukrayina Mudafaa nazirliginiñ Baş istihbarat idaresiniñ vekili Andriy Yusov, ukrayin arbiyleri Qırımda "faal ve körümli" tedbirlerni azırlaylar, dep bildirgen edi.
Qırımda ve Aqyarda 2014 senesinden başlap eñ azından 16 Ukrayina vatandaşı "casuslıq" ve "diversiya"da qabaatlanıp mahküm etildi. 2015 senesi Rusiye mahkemesi rejissör Oleg Sentsovnı teraktlarnıñ teşkil etilmesinde qabaatlap, 20 yılğa üküm etti. Rusiye quvetçileri "diversiya"nı "Hizb ut-Tahrir" islâm siyasiy teşkilâtınıñ vekillerine de yükley. Rusiyeniñ Ukrayinağa tam miqyaslı istilâsı başlağan soñ yarımadada cenk ile razı olmağanlarnı kütleviy surette taqip eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
