Qırımda Krasnoperekopsk rayonınıñ 50 yaşındaki sakini mahkeme etilecek, Rusiye quvetçileri onı SBU ile işbirlikte bulunğanında qabaatladı. Bu aqta Rusiye tarafından teşkil etilgen Qırım prokuraturasınıñ matbuat hızmetine atıf eterek "RİA Novosti Krım" rus agentligi yaza.
Beyanatta aytıla ki, erkek 2025 senesi İlk küzde ava mudafaası sistemalarınıñ bulunğan yeri aqqında malümatnı toplap, messencerlerden birine yollağan.
Qabaatlanğannıñ adı ve soyadı bildirilmey, onıñ açıq izaatları yoq. Cenk şaraitlerinde Rusiye quvetçileriniñ iddialarını alternativ menbalar vastasınen teşkermek qıyın.
Al-azırda onıñ cinaiy davası Rusiye kontrolindeki Qırım Yuqarı mahkemesine berildi. Onıñ qabaatı isbatlansa, oña "devlet hainligi" maddesi boyunca ömür boyu apis cezası berile bile.
SBU bu haberni izaatlamadı.
Rusiyede ve onıñ tarafından işğal etilgen topraqlarda quvetçiler Ukrayina tarafını tutqan sakinlerni taqip eteler. Rusiye tarafdarı Qırımlı bloger Aleksandr Talipov öz telegram kanalında Ukrayinağa qoltutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar tutula ve Rusiye ordusını itibardan tüşürgenleri içün memuriy ve cinaiy mesüliyetke çekile.
Aq qorçalayıcılar, Qırımda Rusiye quvetçileri tarafından açılğan devlet hainligi, Ukrayina ile işbirlik, casuslıq ve diversiya maddeleri boyunca davalarnıñ sayısı artacağını tahmin eteler.