Ukrayina ükümeti fevralniñ 26-nda qayd etilgen Qırımnıñ işğaline qarşı tirenüv kününe tedbirler planını tasdıqladı. Bunı Medeniyet ve haber siyaseti nazirligi haber єttі.
"Maqsat vaqtınca işğal etilgen Qırım ve Aqyarda yaşağan ve Ukrayina topraq bütünligine destegini bildirgen insanlarnıñ cesürligine ve qaramanlığına sayğı köstermektir", - dep yazıla bildirmede.
Planğa köre, mevzulı tedbirler bütün memleket boyunca tasil müessiselerde, kitaphanelerde, sergi zallarında ve müzeylede keçirilecek. Şu cümleden qırımtatar halqınıñ temsilcileri ve Qırımdan köçip kelgenler ile körüşüvler keçirilecek, farqlı bediiy ve vesiqalı mevzulı filmler kösterilecek, ekspertler çıqışta bulunacaq.
Bundan ğayrı, Ukrayina ükümeti "Serbest Qırımğa mektüpler" aktsiyasını planlaştırdı.
Fevralniñ 26-nda cemaatçılıq teşebbüsinen Qırımnıñ Rusiye tarafından işğal etilüvine qarşı tirenüv künü qayd etile. Ukrayina ve bütün dünyada qırımlılarğa ve memleketniñ topraq bütünligine qoltutuv aktsiyaları, munaqaşa, forum, miting ve yürüşler keçirile.
2014 senesi fevralniñ 26-nda Qırım Muhtar Cumhuriyeti Yuqarı Şurasınıñ binası ögünde Ukrayina topraq bütünligine qoltutuv mitingi olıp keçti. Miting iştirakçilerine qarşı Rusiye tarafdarları, hususan «Rus birligi» firqası çıqtı.
2020 senesi yanvar ayında aralarında Ahtem Çiygoz ve Rustem Umerov olğan Ukrayina Yuqarı Radasınıñ deputatları Ukrayina prezidenti Volodımır Zelenskıyge muracaat etip, Qırımnıñ Rusiye işğaline qarşı tirenüv kününi devlet seviyesinde resmiy şekilde pekitmege rica etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
