Yuqarı Radada Qırımnıñ idariy-territorial bölünmesiniñ deñiştirilmesi ile bağlı qanun leyhası qayd etilgen. Bunı Ukrayina prezidentiniñ Qırım MC daimiy temsilciligi haber etti.
"Temsilcilik ve Ukrayina millet vekilleri ile birlikte azırlanğan leyha 2016 ve 2022 seneleri Ukrayina parlamenti tarafından qabul etilgen qararlarnıñ uyğulanmasını köz ögünde tuta. Olarnıñ arasında mesken yerlerniñ adlarınıñ dekommunizatsiyası ve Qırım MC yañı rayon bölünmesi. Evel bu qararlarnıñ ömürge keçirilmesi yarımada işğalden azat etilgen soñ tüşünile edi, amma işğalden azat etüv içün negiz azırlanması kerekligine qarar berildi", - dep bildirdiler temsilcilikte.
Bundan ğayrı Ukrayina ükümetine uzun müddetli planlar azırlamadan Qırımdaki territorial toplulıqlarnıñ bölgelerini ve idariy merkezlerini belgilemek imkânı farz etile.
"Qanun leyhasınıñ qabul etilmesi semereli işğalden azat etilüv içün şart yaracataq, şu cümleden, territorial toplulıqlarnıñ bölgelerinde rayon arbiy idarelerniñ ve arbiy memuriyetlerniñ teşkil etilmesi içün imkân berecek. Bundan ğayrı icra akimiyeti öz territorial bölükleriniñ ğayrıdan tiklenmesini yañı idariy-territorial bölünmesini köz ögüne alaraq planlaştıra bilecek", - dep qayd etile bildirmede.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
