İşğal etilgen Qırımnıñ cenübiy yalısındaki Yalta rayonında Rusiye akimiyeti fevqulâde furtuna ihtarını ilân etti. Bu aqta Yaltanıñ rusiyeli Yekâne nevbetçi-dispetçer hızmeti bildire.
"Orta küzniñ 20-nde saba ve kündüz Qırımnıñ cenübiy yalısında ve dağlarda küçlü yağmurlar yağacaq. Reklama levhaları, zayıf qurulışlar, elektrik ağları, ağaçlar yanında bulunmamaqnı tevsiye etemiz", — denile beyanatta.
Üzen-Çeşme özeniniñ taşması nerticesinde Koreiz qasabasında şiddetli yağanaqlar belediye tabiat fevqulâde vaziyeti olaraq tanıldı. Rusiye Fevqulâde vaziyetler nazirliginiñ idaresinde bildirgenlerine köre, Koreizde devam etken küçlü yağmurlar neticesinde soqaqlarda çamur aqqan. Mesken evlerniñ bir qısmı suv altında qalğan. Suv basqan yerden eki qoranta tahliye etilgen.
Yağanaqlar devam ete. Rusiyeniñ Qırım gidrometeomerkeziniñ malümatına köre, furtuna havfı boyunca eñ çoq furtuna Ay-Petri dağında 450 mm-den ziyade; Yalta MO-da 170 mm-den ziyade; Kezlev keçitinde 40 mm-den ziyade; Angara keçitinde 40 mm-den ziyade qayd etildi.