İyünniñ 10-nda gece Qırımnıñ bir qaç meskün yerinde patlav sesleri eşitildi, dep yaza rusiyeli ve qırımlı telegram kanalları.
Berilgen malümatqa köre, patlavlar Canköy, Kezlev, Qara deñiz, Aq-Şeyq ve Saq rayonlarında eşitildi. "Krımskiy veter" telegram-kanalı yazğanına köre, 6-8 patlavnı Krasnoperekopsk, Canköy rayonlarında ve Pervomayskoye qasabasında eşitkenler. Rusiye monitoring telegram kanalları, Rusiye ava mudafaası Qırım üzerinde 4 ballistik raketanı urıp tüşürdi, dep bildire, lâkin bu malümatnıñ tasdıqlanması şimdilik yoq.
Rusiye Mudafaa nazirligi ve Rusiye akimiyeti bu malümatnı izaatlamadı, ukrayin tarafınıñ beyanatları da şimdilik yoq.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
