İşğal etilgen Qırımnıñ baş nazir muavini Svetlana Maslova, yarımadanıñ suv anbarlarında toplanğan suv ihtiyatları sekiz ayğa yetecek, dep iddia ete. Bunı o, aprelniñ 26-nda suv teminatı ile bağlı brifing vaqtında bildirdi.
«Aqmescit suv anbarındaki faydalı suvnıñ seviyesi 17 faiz, Ayan suv anbarında 91 faiz, Partizan suv anbarında 26 faiz teşkil ete. Umumiy faydalı seviye aman-aman 11 million metr kub suvdır. Bi afta içinde üç suv anbarındaki suv kelmesi 1,2 million, masraf ise – 360 biñ metr kub teşkil etti. Suv anbarlarından kelgen suvnıñ ortalama künlük seviyesi – 46 biñ metr kub», – «Krıminform» Maslovanıñ aytqanlarından alıntı ketire.
Aqmescitte saatlıq suv berilüv cedvelini lâğu etmek içün suv anbarlarına suv kelmesi nasıl olmaq kerek olğanını ayttı.
«Er kün şeerni suvnen temin etmek içün 130 milion metr kubğa ihtiyacımız bar. Böyle suv kelmesi suv anbarlarında suvnıñ toplanmasına imkân berecek ve yañı quyularnı köz ögüne alıp, Aqmescitte saatlıq suv berilüv cedvelini lâğu etmek mümkün olacaq», – «Vesti.Krıma» Maslovanıñ aytqanlarından alıntı ketire.
Keçken afta, Rusiye suv teminatı ile bağlı meselni çezmek maqsadınen Qırım ve Aqyar içün 3,3 milliard ruble ayırğanı haber etilgen edi.
Aprelniñ 19-nda, Qırımnıñ Nazirler şurası yarımadanıñ suv anbarlarında suv kelmesi eksilgenini bildirgen edi. Şu sebepten suvnıñ tutumlı qullanması devam ete. Eñ fena vaziyet Aluştadadır.
Suv qıtlığı sebebinden keçken seneden berli Aqmescitte ve diger regionlarda suv berüv cedvelleri kirsetildi. Bunıñnen beraber Aqmescitte suv teminlevi hatlarında qazalar ola, bu da suv kesilüviniñ sebebi ola.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
