Qırımtatar Milliy Meclisi Qırımnıñ Rusiye işğaline qarşı tirenüv Künü munasebetinen beyanat yayınladı, onıñ Prezidiumı "ukrayin devletine sadıq olğan" Qırım sakinlerine qoltutqanını bildirdi.
"Qırımtatar halqınıñ Meclisi Qırımnıñ Rusiye işğaline tirenüv Künü munasebetinen öz cesürligi ve fedakârlığı ile Qırımnıñ azat etilüvini yaqınlaştırğan Ukrayina Mudafaa quvetleriniñ bütün arbiy hızmetçilerine, qırımtatar halqına ve vaqtınca işğal etilgen Qırımnıñ ukrayin devletine sadıq olğan bütün sakinlerine ürmet ve qoltutuvını bildire", - dep aytıla Qırımtatar halqı Meclisiniñ reisi Refat Çubarovnıñ içtimaiy ağlarda derc etilgen beyanatında.
Qırımtatar Milliy Meclisinde qayd eteler ki, "2014 senesi fevral 26-da Kreml agentlerine qarşılıq köstergen Qırım vatandaş cemiyeti, Ukrayinanıñ uquq qoruyıcı ve mahsus qurulışlarınıñ devlet suverenitetini qorçalamaq içün areket etkenini beklemey edi", ve "Ukrayinanıñ devlet akimiyeti ve idare organlarınıñ areketsizligi, siyasiy küçler ve olarnıñ liderleriniñ vazifeler ve nazirliklerniñ bölüvi içün küreşi, Rusiyege 2014 senesi fevral 26-dan 27-ne keçer gecesi Qırımnıñ strategik obyektlerini zapt etmege imkân berdi".
Mında şunı da qayd ettiler ki, ilhaqnıñ 10 yılı devamında Rusiye Qırımnı "sürgün etilgen Qırım sakinlerine qarşı kütleviy cinayetler, şu cümleden öldürüvler, zorbalıqnen ğayıp etüvler, siyasiy sebeplerden taqipler, fikir serbestligi, din ya da inanç serbestligi kibi diger esas serbestliklerniñ bozuluvı ile bağlı arbiy meydanğa çevirdi".
''Amma on yıllıq vaqtınca işğal qırımtatar halqınıñ ve Qırımnıñ farqlı milletli sakinleriniñ büyük qısmınıñ iradesini bozmadı. Olar ukrain devletine ve öz toprağına sadıq qala, Rusiye işğaline zorbalıqsız qarşılıq köstere", - dep aytıla beyanatta.
Qırımtatar Milliy Meclisi, ileride de "Qırımnıñ Rusiye işğalcilerinden tez vaqıtta azat etilmesine yardım etecek bütün kerekli areketlerni yapacaq", dep bildirdi.
Fevralniñ 26-nda cemaatçılıq tarafından teşebbüs etilgen Qırımnıñ Rusiye işğaline qarşı tirenüv künü qayd etile. Bu künü Ukrayinada ve bütün dünyada qırımlılarğa ve memleketniñ topraq bütünligine qoltutuv aktsiyaları, munaqaşalar, forumlar, mitingler, yürüşler keçirile.
2014 senesi fevral 26-da QMC Yuqarı Radasınıñ binası ögünde Ukrayinanıñ topraq bütünligine qoltutuv mitingi olıp keçti. O vaqıt miting iştirakçilerine Rusiye tarafdarları, şu cümleden "Rusiye birligi" firqasından olğan faaller qarşılıq köstergen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
