İşğal etilgen Qırımnen memuriy sıñırnı keçkende, elektron taşıyıcılarındaki malümatqa diqqatlıca olmaq kerek. Böyle fikirni Qırım uquqqoruyıcı gruppasınıñ eksperti Vladimir Çekrıgin Qırım.Aqiqat Radiosınıñ efirinde ifade etti.
Çekrıginniñ aytqanına köre, rusiye sıñırcıları ve FSB hadimleri er türlü “sezirli” malümatnı Ukraina vatandaşlarına qarşı qullana bile.
“Yañınızğa tehnikanı taşımağa ihtiyac olmasa, onı almamaq daa yahşı olur edi. Çeşit kerekmegen nomerleri olmağan eñ sade smartfon alıp, onen Qırımğa barmağa kerek. Amma tehnika ihtiyacı olsa eger, bütün “sezirli” malümatnı bulut toplamına yüklep, episini kompyuterden silmege kerek. Ve, eñ azından, kiriş parollerniñ olması lâzim. Malümat şifrlengen olsa, asıl mükemmel”, - dep tevsiye ete uquqqoruyıcı.
Çekrıginniñ aytqanına köre, içimaiy ağlardan da çıqmaq kerek, anda “FSB hadimleriniñ diqqatını celp etecek malümat bulunsa, akkauntlarnı vaqtınca yoq etmek yahşı”.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
