Yarımadanı terk etmek mecbur olğan qırımlı "Jovta striçka" areketiniñ faali Violetta Stolârova Suspilnege intervyü berir eken, Ukrayinanı desteklegeni içün Rusiye quvetçileri tarafından taqip etilmesiniñ tafsilâtını aytıp berdi.
Stolârova mavı ve sarı şeritler öre ve işğal etilgen Aqyarnıñ adam çoq yürgen yerlerinde asıp çıqa edi.
"Birinci şeritni men pensiya fondunıñ binası yanında astım. Onıñ yanından çoq adam keçe, hususan da Sovet Birligine sevda olğan qart adamlar. Ve menim maqsadım şeritni tam böyle bir yerde asmaq edi", - dep haber etti Violetta.
Ukrayinağa qarşı yapılğan nevbetteki raketa ücüminden soñ Violetta sarı ve mavı boya aldı ve vatanperver şiarlarını yazmağa başladı. Qadın, olarnı silip taşlağanlarını ayta, hususan da adam çoq olğan yerlerde.
"Bir kere meni videokameralar qayd etti ve angi tarafqa ketkenimni taqip ettiler. Soñra da menim angi yolnen ketkenimni ögrenip bildirler. Yolda maşna az edi ve olar qolay meni taptılar", - dep atsta faal.
Bundan eki kün soñra Rusiye quvetçileri onıñ evinde tintüv keçirgenler. Qadın yapqanlarını itiraı etmege mecbur qalğan ve bunı Rusiyeniñ Belarusta özek silâsını yerleştirmek qararına qarşı cevap olaraq añlattı.
"Olar maşnağa oturmağa ve bularnı nasıl etip yapqanımnı köstermege teklif ettiler. Ve biz kettik. Amma yolda daa diger boya kördiler. Onı ve daa bir qaç diger allarnı da qabul etmege mecbur oldım", - dep aytıp bere Violetta.
Bundan soñ qadınnı FSB idaresinde sorğuğa çekkenler. Anda evelden yazıp azırlanğan metinni kamera ögünde oquttqanlar. Telefonını tutıp alqanlar ve evge yibergenler. Bunda soñ o yarımadanı terk etmek qararına kelgen.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
