«Qırımnıñ barışıq yolunen qaytuv vaqtı endi bitti», al-azırda «Rusiye ile er angi meseleni siyasiy yolnen al etüv variantları yoq», dep bildirdi Ukrayına prezidentiniñ ofis reberiniñ mesleatçısı Mıhaylo Podolâk Qırım.Aqiqatqa bergen intervyüsında.
«Açıq-açıq aytayıq, 8 yıl devamında Qırım aqqında aytmaq içün ayttıq. Siyasiy-diplomatik çezilüv aqqında aytıp, bunıñ imkânsız olğanını añlay edik. Yani bizler, siz-biz degil, tek Ukrayına da degil, bütün dünya siyasiy-diplomatik çezilüv imkânı bar dep aytqan edik. O vaqıt sizni Pridnestrovyege qaytarayım – çezildimi? Beşke eki qoşmaq formulasınen. Ya da, meselâ, Abhaziya – çezildimi? Yoq! Rusiye bu memleketlernen añlaşmaq kerek olğanını küçten añlamasa, bir şey çezmeycek», – dep ayttı Podolâk.
Aynı vaqıtta, Podolâknıñ aytqanına köre, Rusiyeniñ Qırımnı tutacaq resursları yoq, cenkleşmek içün küçü 2023 senesiniñ baarine qadar qaldı.
«Altı ay, beş ya da yedi ay – Qırımda olacaqmız. On ay evelsi daa beter vaziyetni kördik ve kimse 10 aydan soñ cenk bizge Qırımnı azat etmege imkân berecek dep laf etecegimizni ciddiy-ciddiy tüşünmegen edi, doğrumı? Biz bunı aytmadıq da. Kimse 2022 ya da 2023 senesi Qırım kene Ukrayınağa qaytacağını ayta bilecegimizge kimse inanmağan edi. Er kes bu 20-30-50 yıl devam etecek, dep tüşüngen edi», – dedi Podolâk.
Onıñ aytqanına köre, Qırımnı işğalden qurtaruv müddetleri «pek optimistik olsa da, bu esaplanğan bir optimizm ola».
Bıltır oktâbrniñ 1-nde Ukrayına istihbaratınıñ yolbaşçısı Kırılo Budanov Natalâ Moseyçukqa intervyü berip, Ukrayına Silâlı quvetleri 2023 senesi baariniñ soñuna qadar Qırımğa kirer, dep bildirdi.
Lâkin Ukrayına Silâlı quvetleriniñ baş komandanı Valeriy Zalujnıy işğalden qurtaruv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq müim, dep ayttı.
Ukrayına prezidenti ofisiniñ yolbaşçı mesleatçısı Mıhaylo Podolâk Qırım sakinlerini sığınaqlarnı kontrol etip, Ukrayınanıñ «işğalden azat etüv tedbirleri» sebebinden yedek suv azırlamağa çağırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
