Ukraina Qırımnı işğalden qurtaruv halqara meydançığınıñ başlatılmasını Rusiyesiz teklif ete bile, amma ileride onıñ da muzakerege qoşulması mümkün. Böyle fikirni Ukraina Yuqarı Radası «Ses» («Ğolos») fraktsiyasınıñ deputatı Rustem Umerov Qırım.Aqiqat Radiosınıñ yayınında bildirdi.
«Muzakerelerni başlatıp, ortaqlarımıznı celp etmelimiz, belki, daa soñra Rusiye qoşula bilecek bir variant tapılır… Bu meydançıqnı Amerika Birleşken Devletlerinde teklif etmek ve bir qaç memleket üzerinden – Kanada, Büyük Britaniya, Almaniya ve diger memleketlerden keçirmek ğayemiz bar edi», – dep qayd etti halq deputatı.
Rustem Umerov böyle forumnıñ Kyivde keçirilmesi de mümkün olğanını inkâr etmey, amma soñki qararnı Prezident ofisi ve Ukraina Tış işler nazirligi qabul etmeli, dep qayd etti.
Rusiyeli siyasetşınas İgor Eydman bu meseleni izaatlap, Kreml Qırımnı işğalden qurtaruv muzakerelerine razı olmaz, dep eminliknen bildirdi, amma, onıñ fikirince, olar kene de başlatılmalı.
«Vladimir Putin akimiyette qalğan vaqıtta Qırım muzakerelerinde Rusiye iştirak etecegini tüşünmeyim. Bu meselede bir adım keri atmaz. Diger taraftan, Qırım meselesi platformasınıñ yardımınen halqara cemaatçılıqnıñ diqqatı bu problemge celp etilecek, Rusiyeniñ onı al etmege ve Qırımğa diqqat ayırmağa istemegeni kösterilecek», – dep tüşüne siyasetşınas.
Ukraina Tış işler naziri Dmıtro Kuleba iyünniñ 2-nde Berlin ziyareti vaqtında Kyiv «Qırımnıñ işğalden qurtarıluvı qaçınılmaz olğanına dair» halqara muzakere platformasınıñ qurulmasını halqara ortaqlarınen muzakere ete, dep bildirdi.
Kuleba, Ukraina Tış işler nazirligi Qırımnı işğalden qurtaruv strategiyasını azırlay, dep bildirgen edi. Şimdilik bu plannıñ tek qaralama leyhası bar, amma Milliy telükesizlik ve mudafaa şurası, ükümet ve Prezident ofisiniñ teklifleri köz ögüne alınıp kenişletilecektir.
Kyivdeki soñki matbuat konferentsiyasında Ukraina prezidenti Volodımır Zelenskıy Ukraina işğal etilgen topraqlarını, hususan Qırımnı kontroline qaytaruvdan vazgeçmey, dep işandırdı.
Baş nazir muavini – Ukrainanıñ vaqtınca işğal etilgen topraqlarınıñ reintegratsiya naziri Oleksiy Reznikov Qırım.Aqiqat Radiosınıñ yayınında Ukraina akimiyeti Qırımnıñ işğalden qurtarıluvınen bağlı muzakereler içün halqara meydançıqnı qurmağa istey, dep qayd etti. Amma onıñ ne vaqıt ve nasıl bir formatta olacağını tahmin etip olamay.
