Ukraina TİN birinci muavini Emine Ceppar, Ukrainanıñ Birleşüv künü ile hayırlap, ukrain diplomatları içün Qırım “prioritetli vazifelerden biri olğanını” qayd etti.
“Bugunde Ukrainanıñ birleşüvi ve Donbasnıñ vaqtınca işğal etilgen topraqlarınıñ qaytarıluvı ve Qırımnıñ işğalden azat etilüvi bizim prioritetli vazifemizdir. Ukraina TİN diplomatları bunıñ oğrunda er kün çalışalar! Eminim ki, tezden Birleşüv künü, Qırım ve Donbas ukrain topraqları Ukraina terkibine reintegratsiya etilgen zaman bizim içün yañı ve hususiy bir emiyet qazanacaq”, dep yadı o Facebook saifesinde.
Ukrainada Birleşüv kününe bağışlanğan Kyiv ve Aqmescit ukrainalerini virtual birleştirgen onlayn aktsiya keçe.
День Соборности Украины в Крыму. Вспоминаем, как это было (фотогалерея)
Ukrainanıñ Maneviy birleşüv Künü er yıl, Ukraina Halq Cumhuriyeti (UHC) ile Ğarbiy Ukraina Halq Cumhuriyetiniñ (ĞUHC) 1919 senesi yanvarniñ 22-nde ğayrıdan bir ukrain devletine birlişmesi Aktı ilân etilgen kününde qayd etile.
2014 senesiniñ başında Qırım Rusiye tarafından işğal etilgen soñ bu bayram yarımadada qayd etilmey, lâkin Aqmescitte T.Şevçenko abidesi ögünde ukrain timsallerinen yaraştırılğan çeçekler peyda ola.
2017 senesi Qırımdan köçmege mecbur olğanlar ve diger faaller Kyivde «birleşüvniñ canlı zıncırını» yaptı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
