Rusiye prezidenti Vladimir Putin Qırım işğali sebebinden Ukraina ve ğarbiy memleketler tarafından kirsetilgen sanktsiyalarğa cevap olaraq kirsetilgen iqtisadiy sanktsiyalarnı uzattı. Buña dair buyruq Rusiye uquqiy malümat portalında derc etildi.
«Ayrı iqtisadiy tedbirlerni 2021 senesi yanvarniñ 1-nden dekabrniñ 31-ne qadar uzatmağa emir etem», – dep aytıla vesiqada.
Hatırlatamız, Rusiye sıñırlav tedbirleri sebebinden bu memleketke Ukraina, ABD, AB devletleri, Kanada, Avstraliya ve bir sıra diger memleketten bazı köy hocalıq mallarını, hammal ve azıq ketirmege yasaqlana.
AB Ukraina temsilciligi, Avropa parlamentiniñ çetel işleri Komiteti Avropa Parlamentiniñ Ukraina maruzasını tasdıqladı, dep bildirdi. Anda Rusiyege qarşı sanktsiyalarnı saqlamaq niyetleri ve Qırımnı işğalden qurtaruv muzakerelerine başlamaq çağıruvları aqqında aytıla.
Kyivde 2021 senesi mayıs ayında Qırımnı işğalden qurtaruv halqara sammitini ötkermege planlaştıralar. Türkiye, ABD ve Baltiya memleketleri olğan bir sıra memleket iştirak etmege istey, Kyiv Rusiyeni de muzakere masasına davet etmege planlaştıra.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
