Rusiye kontrolindeki Qırım Yuqarı mahkemesi, İslâm-Terek rayon mahkemesiniñ Eski Qırım sakini Riana Kulametovağa «VKontakte» içtimaiy ağında saqlağan videolarda bulunğan 2011 ve 2013 seneleriniñ videoları içün para cezasını bermek qararını deñiştirmedi.
«Qırım birdemligi» birleşmesiniñ bildirgenine köre, Kulametova «yasaqlanğan teşkilâtnıñ timsallerini açıq numayış etkeni» içün para cezasını aldı.
Riana Kulametovanıñ Qırım.Aqiqatqa bildirgenine köre, «VKontakte» ağında saqlanğan videolar arasında Eski Qırımdaki Oraza bayramı ve Aqmescitteki miting bar edi. Bu levhalarda arap urufatında yazuvlı şiarlar körüne. Mahkeme bunı «Hizb ut-Tahrir» bayraqları olaraq tanıp, Riananı «yasaqlanğan teşkilâtnıñ timsallerini açıq numayış etkeni içün» biñ ruble para cezasını tayin etti.
Kulametova qararğa razı degil. Onıñ aytqanına köre, bayraqlar yasaqlanğan teşkilâtnıñ timsalleri degil, basma üstünde «Allahtan ğayrı Tañrı yoqtır. Hazreti Muhammed Onıñ Peyğamberidir», dep yazılğan.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
