Link açıqlığı

Qırımnıñ yañı «baş nazir muavini» Ruslan Balbek milletlerara munasebetler ve sürgün olunğan halqlar abadanlaştıruvınen bağlı meselelernen oğraşacağını bildirdi, dep tekrarlay onıñ aytqanlarını KİA Qırım agentligi.

«Cumhuriyette milletlerara barışıq pekitilmesi, em de Rusiye Federatsiyasınıñ Prezidenti Vladimir Putinniñ ermeni, bulğar, yunan, qırımtatar ve nemse halqlarınıñ reabilitatsiyası aqqında emirni yerine ketirmek vazife dep sayam», – dep qayd etti o.

Balbek şunı da bildirdi ki, «Sergey Aksönov qabarcılıqnı yoq etmege ve sürgün olunğan halqlarnıñ ihtiyaclarına ayırılğan paranı adaletli alda tarqatuvnı temin etmege avale etti».

Qırımnıñ öz başına ilân etilgen «ükümeti» bildirgenine köre, devlet qol tutuvı aqqında programma azır, oña köre sürgün etilgenlerniñ ihtiyaclarına 760 million ruble sarf etilecek.

Hatırlatamız, çarşenbe künü, mayıs 28-de, Qırım «parlamenti» Lenur İslâmovnı Qırımnıñ «baş nazir muavini» vazifesinden istifağa yolladı. Onıñ yerine Qırımtatar Milliy Meclisine qarşı olğan Ruslan Balbek tayin etildi.

Qırımtatar Milliy Meclisi reisi Refat Çubarov Qırım «baş nazir muavini» vazifesini eda etken Lenur İslâmovnıñ istifası aqqında qarar «idare meselesi degil de, yalıñız siyasiy qarar» olğanını ayttı.

«Devlet idaresi saasında iç bir vaqıt çalışmağan, cemaat arasında Moskva ve Qırımda muvafaqiyetli leyhalar ile belli olğan ihtisasiy menecer Lenur İslâmovnıñ istifası aqqında qarar idare meselesi degil de, siyasiy qarar olğanını bilemiz», – dedi Çubarov.
XS
SM
MD
LG