Qırımnıñ suv anbarlarında suv acimi keçken senege baqqanda eki qat eksildi. Yerli Gidromettsentr malümatına köre, 2019 senesi mayıs ayında suv yedegi 204,955 mln metr kub edi, bu sene mayıs ayında olğan yedekten 110,175 mln metr kub ziyadedir.
Gidrologlarnıñ malümatına köre, aprel ayında Qırım suv anbarlarına az suv keldi: Qarasuvbazar suv anbarında 1,89 million metr kub, Sçastlivoye 0,285 million metr kub, Çernoreçenskoye suv anbarında 0,932 million metr kub toldı. Aqmescit suv anbarına aprel ayında tek 570 biñ metr kub keldi.
«Aquv yapqan yağanaqlarnıñ az yağması bütün özen havuzlarında bu yıl mevsimine ait olmağan alçaq bir suv seviyesiniñ sebebi oldı. Aluşta, Sudaq ve Kefe sel özenleriniñ çoqusı qurudı», – dep qayd etti Gidromettsentr.
Neticede Qırım suv anbarlarındaki suv yedegi mayısnıñ başında 94,78 million metr kub oldı. Bu keçken ayğa köre 11,49 million metr kub azdır, dep qayd ete gidrologlar.
Rusiye kontrolindeki Aqmescit şeer yolbaşçısı Yelena Protsenko şeer sakinlerini suv saqlamasına çağırıp, «vaziyet pek zor», dep qayd etti.
Keçken afta Qırımnıñ Rusiye yolbaşçısı Sergey Aksenovnıñ bildirgenine köre, yağanaqlar olmasa bile, Aqmescitniñ üç esas suv çoqrağı olğan Ayan yapma gölü, Aqmescit ve Partizan suv anbarlarındaki suv yedegi şeerni 3,5 ay devamında toqtamayıp suvnen temin etmek içün yeter.
Qırımnıñ suv hocalığı ve melioratsiya Rusiye devlet komitetiniñ bildirgenine köre, Şarqiy Qırım sakinleriniñ suvnen temin etilüvi stabil olıp qala. Müessise malümatına köre, aprelniñ 17-ne qadar yarımadanıñ bu tarafındaki suv anbarlarınıñ yüzde otuz altısı tolu.
