Anayasa komissiyası, Qırımnıñ statusınen bağlı Ukraina Anayasasına kirsetilecek deñişmeler leyhasını eñ yaqın zamanda incelep, Ukraina prezidentine taqdim etecek.
Bu aqta Ukraina prezidenti Petro Poroşenkonıñ noyabrniñ 12-nde Kyivde toplaşqan Qurultay delegatlarına berilgen mektübinde aytıla, onı Qırımtatar Milliy Meclisiniñ reisi, Ukraina halq deputatı Refat Çubarov oqudı, dep bildire Qırım.Aqiqat mühbiri.
«Epimiz bu munaqaşanıñ qolay olmaycağını bilemiz, amma qırımtatar halqınen bağlı Anayasağa kirsetilecek deñişmeler Ukrainağa kerek», – dep qayd etti Poroşenko.
Poroşenko, Kyivdeki konferentsiyağa kelmege qorqmağan delegatlarğa teşekkürler bildirdi.
«Çoquñız konferentsiyağa Qırımdan keldi. Bilem ki, işğalcilerniñ yapqanları neticesinde bugünde-bugün yarımadada qırımtatarı olmaq cinayet sayılmaqta. Qırımtatar halqınıñ temsilci organlarınen bağlı olmaq ise daa beterdir. Yıllarnen devam etken sürgünlikten soñ vatanına qaytqan halqıñız öz temsilci organlarınıñ faaliyetini yañıdan saqlap oldı, şimdi ise istilâcı, milliy institutlarnı bastırmağa çalışıp, qırımtatar halqınıñ büyük zorluqlarnen elde etken şeylerni yoq etmege tırışa. Mence, Rusiye yapqanlarınıñ utopik olğanını daa añlamadı. Şübesiz ki, qırımtatar halqına Ukraina halqından ğayrı bütün dünya toplulığı qoltuta», – dep aytıla Ukraina prezidentiniñ mektübinde.
Ukraina haber siyaseti naziriniñ birinci muavini Emine Ceppar, qırımtatar muhtariyetiniñ «separatizmnen iç bir alâqası olmağanını» añlatqan edi, onıñ qurulması tamır halqnıñ BM tamır halqlarnıñ aqları Deklaratsiyasında qayd etilgen aqqı ola. Ukraina işbu beyannamege 2014 senesi qoşulğan edi.
Kyivde VI çağırılış Qırımtatar Milliy Qurultayı delegatlarınıñ konferentsiyası keçirile. Tedbirge 200 iştirakçiden ziyade keldi.
Birinci Qırımtatar Milliy Qurultayı 1917 senesi noyabr ayında saylanğan edi. 1917 senesi dekabrniñ 9-ndan 26-na qadar esas qırımtatar qanunlarını qabul etken milliy tesis toplaşuvı olaraq çalışqan edi.
1991 senesi Qırımtatar Milliy Qurultayı faaliyetini yañıdan başlattı. Ukrainada qırımtatarlarnıñ yuqarı temsil organı olaraq tanıldı. Qırım işğalinden soñ Rusiye onıñ faaliyetini yasaq etti.
