Rusiye nezaretindeki Seyitler (Nijnegorskiy) rayonınıñ başı Aleksandr Petrov, odasındaki vaqia aqqında tefsir bermekten vazgeçti.
"Diñleñiz ve yazıp qoyuñız: Qırım - bizim. Ukraina da bizim olacaq. Öpem. Sağlıqnen qalıñız", - dedi Petrov Qırım.Aqiqatqa ve lafnı üzdi.
Qırım faalleri, Petrov, şahsiy qabul etüvde “Siz - men ürmet etmegen insansıñız” degen kelgen adamnı urdı. Bu vaqia videoğa çekildi ve Rusiye tarafdarı olğan bloger Aleksandr Talipovnıñ Facebook saifesinde derc etildi.
Videoda Petrovğa oşağan adam, “Mında sen degil, siz. Mında er kes - ürmetli insan”, dep kelgen aqaynı urdı. Bundan soñ video çeküvi bite.
Keççe Talipov, Petrov onı urdı, dep aytqan adamnen videonı derc etti.
“Elime urdı, ayağınen sol sanıma urdı, bedenime zarar ketirdi. Acele yardımnı çağırtmağa kerek oldı. Maña ilk tibbiy yardım ettiler”, - videoda adını aytmağan adam dey.
Qırımnıñ Rusiye müessiseleri bu hususta haber etmey.
Daa evel “İzvestiya” gazetası bildirgeni kibi, 1999 senesi Qırımda Petrov, “Narkotiklerniñ qanunsız saqlavı ve taşıması” madde boyunca maküm etilgen edi. Oña bir yıllıq şartlı apis cezası ve 1000 grivna para cezası maküm etilgen edi.
